عید اشعار – Eid Urdu Poetry

 

جس طرف تو ہے ادھر ہوں گی سبھی کی نظریں

عید کے چاند کا دیدار بہانہ ہی سہی

(امجد اسلام امجد)

 

اس سے ملنا تو اسے عید مبارک کہنا

یہ بھی کہنا کہ مری عید مبارک کر دے

(دلاور علی آزر)

 

عید کا دن ہے گلے آج تو مل لے ظالم

رسم دنیا بھی ہے موقع بھی ہے دستور بھی ہے

(قمر بدایونی)

 

عید کا دن ہے سو کمرے میں پڑا ہوں اسلمؔ

اپنے دروازے کو باہر سے مقفل کر کے

(اسلم کولسری)

 

نماز عید کی پڑھ کر میں ڈھونڈھتا ہی رہا

کہیں دکھے کوئی اپنا گلے لگانا ہے

(سید سروش آصف)

 

شہر خالی ہے کسے عید مبارک کہیے

چل دیے چھوڑ کے مکہ بھی مدینہ والے

(اختر عثمان)

 

کسی کی یاد منانے میں عید گزرے گی

سو شہر دل میں بہت دور تک اداسی ہے

(اسحاق وردگ)

 

جب آیا عید کا دن گھر میں بے بسی کی طرح

تو میرے پھول سے بچوں نے مجھ کو گھیر لیا

(بسمل صابری)

 

مجھ خستہ دل کی عید کا کیا پوچھنا حضور

جن کے گلے سے آپ ملے ان کی عید ہے

(بیدم شاہ وارثی)

 

یہ جو تم عید پہ بھی آتے نہیں لوٹ کے گھر

کوئی چھٹی کا نہیں ہوتا بہانہ تم کو

(ماہم شاہ)

 

دیکھا نہ اسے دور سے بھی منتظروں نے

وہ رشک مہ عید لب بام نہ آیا

(میر تقی میر)

 

حالات شہابؔ آنکھ اٹھانے نہیں دیتے

بچوں کو مگر عید منانے کی پڑی ہے

(شہاب صفدر)

 

وہ صبح عید کا منظر ترے تصور میں

وہ دل میں آ کے ادا تیرے مسکرانے کی

(فانی بدایونی)