مہک رہے ہیں جو یہ پھول لب به لب مری جان – افتخارعارف کی غزل

غزل

 

مہک رہے ہیں جو یہ پھول لب به لب مری جان!

جو تم نہیں ہو تو پھر کون ہے سبب مری جان!

 

اداسیوں بھری شامیں جہاں سے آتی ہیں

وہیں سے آئی ہے یہ ساعتِ طرب مری جان!

 

مری کتابیں، مری خوشبوئیں، مری آنکھیں

تمھارے ہجر میں جاگے ہیں سب کے سب مری جان!

 

تمھارے ساتھ، جو گزرے تمھاری یاد کے ساتھ

نہ ویسے دن کبھی گزرے نہ ویسی شب مری جان!

 

بہم ہوئے ہیں ذرا دیر کو تو خوش ہو لیں

کے خبر کہ بچھڑ جائے کون کب مری جان!

 

کوئی دن اور کہ ہو جائیں گے فسانہ ہم

ہماری یاد ستائے گی تم کو جب مری جان!

 

بہت دنوں میں کہی میں نے اس طرح کی غزل

وگرنہ دل کی یہ حالت ہوئی تھی تب مری جان!