دیپک رنگ ہے چاہت اپنی کا ہے منائیں تمہیں – ظہورنظر کی غزل / Urdu Ghazal By Zahoor Nazar

غزل

 

دیپک رنگ ہے چاہت اپنی کا ہے منائیں تمہیں

ہم تو سلگتے ہی رہتے ہیں، کیوں سلگا ئیں تمہیں

 

ترک محبت ، ترک تمنا کر چکنے کے بعد

ہم پہ یہ مشکل آن پڑی ہے کیسے بھلائیں تمہیں

 

دل کے زخم کا رنگ تو شاید آنکھوں میں بھر آئے

روح کے زخموں کی گہرائی کیسے دکھائیں تمہیں

 

درد ہماری محرومی کا تم تب جانو گے

جب کھانے آئے گی چپ کی سائیں سائیں تمہیں

 

سناٹا جب تنہائی کے زہر میں گھلتا ہے

وہ گھڑیاں کیونکر کٹتی ہیں ، کیسے بتائیں تمہیں

 

جن باتوں نے پیار تمہارا نفرت میں بدلا

ڈر لگتا ہے وہ باتیں بھی بھول نہ جائیں تمہیں

 

رنگ برنگے ہاتھ تمہارے پھر میں ہاتھ آئے

پھر بھی یہ کیسے چاہیں کہ ساری عمر نہ پائیں تمہیں

 

اُڑتے پچھپی ، ڈھلتے سائے ، جاتے کل اور ہم

بیرن شام کا تھام کے دامن روز بلائیں تمہیں

 

!دور گگن پر بننے والے نرمل کو مل چاند

بے کل من کہتا ہے ، آؤ، ہاتھ لگائیں تمہیں

 

پاس ہمارے آکر تم بے گانہ سے کیوں ہو؟

چاہو تو ہم پھر کچھ دوری پر چھوڑ آئیں تمہیں

 

انہونی  کی چنتا، ہونی  کا  انیائے نظرؔ

دونوں بیری ہیں جیون کے ہم سمجھائیں تمہیں